Instituti për Siguri dhe Reziliencë – PREVENT, ka dënuar sulmin e së premtes në veri, kur u dëmtua kanali kryesor i Ibër Lepencit në fshatin Vragë, në komunën e Zubin Potokut.
PREVENT ka kërkuar nga autoritetet shtetërore të sigurisë dhe Qeveria e Kosovës që të rrisin bashkëpunimin me mekanizmat ndërkombëtarë të sigurisë, për të menaxhuar situatën dhe për të garantuar stabilitetin dhe sigurinë në veriun e vendit.
Po ashtu, Instituti ka apeluar që Ministria e Punëve të Brendshme dhe institucione të tjera të përshpejtojnë krijimin e mekanizmave të nevojshëm për zbatimin e ligjit mbi mbrojtjen e infrastrukturës kritike.
“Instituti PREVENT bën thirrje Ministrisë së Punëve të Brendshme dhe institucioneve të tjera shtetërore, duke përfshirë edhe sektorin privat, që të përshpejtojnë procedurat për krijimin e mekanizmave të duhur shtetëror për zbatimin e plotë të ligjit mbi mbrojtjen e infrastrukturës kritike. Ky bashkëpunim ndërsektorial është jetik për të parandaluar incidente të tilla në të ardhmen”, shkruan në komunikatë.