Telenews

Putini premton armëpushim me këtë kusht për Ukrainën

Presidenti i Rusisë, Vladimir Putin, është zotuar të premten se do të urdhërojë “menjëherë” armëpushim në Ukrainë dhe fillim të bisedimeve, nëse Kievi fillon t’i tërheqë trupat nga katër rajonet e aneksuara nga Moska më 2022 dhe të heqë dorë nga kërkesa për t’iu bashkuar NATO-s.

Një marrëveshje e tillë duket e pamundur për Kievin, i cili dëshiron t’i bashkohet aleancës ushtarake dhe ka kërkuar që Rusia t’i tërheqë trupat nga i gjithë territori ukrainas. Ukraina nuk e ka komentuar ende propozimin e Putinit.

“Ne do ta bëjmë menjëherë”, tha Putin gjatë një fjalimi në Ministrinë e Jashtme të Rusisë në Moskë.

Ai i bëri këto komente në një kohë kur liderët e Grupit të Shtatë vendeve më të industrializuara u takua në Itali dhe në prag të samitit për paqe në Zvicër, ku dhjetëra liderë nga e gjithë bota – përjashtuar Moskën – do të marrin pjesë këtë fundjavë për të diskutuar për hapat e parë drejt paqes në Ukrainë.

Putini tha se propozimi i tij synon arritjen e një “zgjidhjeje përfundimtare” për konfliktin në Ukrainë dhe theksoi se Kremlini është “i gatshëm për t’i nisur bisedimet pa vonesa”.

Kërkesa të tjera për paqe që lideri rus i nënvizoi përfshijnë edhe statusin e vendit jobërthamor të Ukrainës, kufizime ndaj forcave të saj ushtarake dhe mbrojtjen e interesave të rusëve që jetojnë në Ukrainë.

Ai tha se të gjitha këto duhet të jenë pjesë e “marrëveshjeve thelbësore ndërkombëtare” dhe se Perëndimi duhet t’i heqë sanksionet kundër Rusisë, gjithashtu.

“Ne bëjmë thirrje të kthehet kjo faqe e historisë dhe të fillojmë rikthimin e unitetit, hap pas hapi, mes Rusisë dhe Ukrainës dhe në Evropë në përgjithësi”, tha ai.

Ky është një rast i rrallë kur Putini shpalos qartazi kushtet e tij për t’i dhënë fund luftës në Ukrainë, por ai nuk pati kërkesa të reja.

Kremlini ka thënë edhe më parë se Kievi duhet t’i njohë rajonet e uzurpuara nga Moska dhe ta tërheqë kërkesën për anëtarësim në NATO.

Rusia nuk i ka në kontroll të plotë asnjërin prej katër rajoneve që i uzurpoi jashtëligjshëm më 2022, por Putini nguli këmbë të premten se Kievi duhet të tërhiqet nga to plotësisht dhe t’ia dorëzojë ato Moskës.

Në Zaporizhja në juglindje, Rusia nuk e ka në kontroll kryeqytetin e këtij rajoni i cili i ka 700.000 banorë, sic nuk e ka as në rajonin fqinj Herson./REL/

Të ngajshme

Vuçiq thotë se këtë javë pret të takohet me këta dy liderë evropianë

Donat Hashani

Dy vdekje misterioze brenda një jave në Rusi, të dy aleatë të ish-ministrit të Mbrojtjes

Donat Hashani

Video e re e 20-vjeçarit duke u pozicionuar për të qëlluar Trump

Donat Hashani