Projektrezoluta e Partisë Demokratike të Kosovës për adresimin e gjetjeve të raportit të Departamentit Amerikan të Shtetit (DASh) nuk është hedhur në votim, sepse kishte mungesë të deputetëve në seancën plenare.
Projektrezoluta është lexuar nga deputeti i PDK-së, Bekim Haxhiu, i cili ka thënë se ky dokument obligon Qeverinë Kurti që brenda 30 ditësh të hartojë një plan konkret për adresimin e gjetjeve të raportit të DASH-it, të përmbajë veprime konkrete për secilën gjetje të raportit dhe Qeveria brenda afateve të raportojë në Kuvend për implementimin e këtyre masave.
Nënkryetarja e Kuvendit, Saranda Bogujevci, nuk e ka hedhur projektrezolutën në votim për mungesë kuorumi.
Kujtojmë që më 22 prill, DASH-i ka publikuar raportin për Kosovën, ku shqetësimet kryesore ishin problemet me pavarësi të gjyqësorit dhe kufizimet në liri të medieve.
Në raport thuhet se më 2023 nuk është raportuar për ndonjë ndryshim të madh sa i përket situatës me të drejta të njeriut në Kosovë.