Pas 19 ditësh në paraburgim në stacionin policor në pikën kufitare në Jarinje, djali i Dejan Pantiq, Predrag Pantiq ka konfirmuar se babai i tij ka arritur në shtëpi.
Predrag Pantiq ka thënë për mediumin serb Kosova Online, se babai i tij po ndihet mirë, por se ende nuk kanë pasur kohë të ulen e të bisedojnë dhe se ende nuk u ka treguar se si “është trajtuar nga pjesëtarët e Policisë së Kosovës”.
“Ai ndihet mirë, nuk u ankua për trajtimin, nuk patëm kohë të bisedonim sepse të gjithë po telefononin, por e rëndësishme është që ai ka ardhur, është mirë dhe nuk ka probleme të mëdha. Ne jemi shumë të emocionuar dhe të lumtur”, ka thënë djali i Pantiç për Kosovo Online.
Kujtojmë se, ish-polici serb Dejan Pantiq u arrestua më 10 dhjetor në pikën kufitare në Jarinje, ku pas arrestimit të tij serbët në veri vendosën barrikada duke penguar edhe transferimin e tij në Prishtinë. Ndërsa ditën e sotme, me vendim të Gjykatës Themelore në Prishtinë, atij i’u ndryshua masa nga paraburgimi në arrest shtëpiak.