Patriarku i Kishës ortodokse serbe (KOS) Porfirije sot pasdite raportohet se ka mbërritur në Patrikanën e Pejës, ku do të festojë Pashkët ortodokse me besimtarë, klerikë dhe murgj nga Kosova.
Sipas njoftimit të KOS-it, thuhet se patriarkun e ka pritur Mitropoliti i Rashkës dhe Prizrenit Teodosije.
Është bërë e ditur se Patriarku Porfirije do të shërbejë nesër në manastirin e Deçanit, ndërsa për Pashkë në Patrikanën e Pejës.
Në maj të vitit të kaluar, në vendkalimin Merdare, autoritetet e Kosovës nuk lejuan patriarkun Porfirije dhe shtatë hierarkë të Kishës ortodokse serbe të hyjnë në Kosovë.
Klankosova.tv gjatë ditës së djeshme ka pyetur në Ministrinë e Jashtme në lidhje me atë nëse i është dhënë leja Patriarkut Porfirije, por të njëjtit nuk kanë kthyer përgjigje.