Rusia ka pezulluar trafikun përgjatë korridorit të sigurisë të krijuar nga marrëveshja e grurit të Detit të Zi, pasi OKB-ja, Turqia dhe Ukraina kanë rënë dakord për një plan lëvizjeje për 16 anije që ndodhen në ujërat turke.
“Deri në sqarimin e situatës rreth aksionit terrorist të kryer nga Ukraina më 29 tetor të këtij viti kundër luftanijeve dhe anijeve civile në Sevastopol, trafiku përgjatë korridorit të sigurisë të përcaktuar nga Iniciativa e Detit të Zi është pezulluar”, tha Ministria ruse e Mbrojtjes në një deklaratë sonte.
Deklarata përsërit se Moska pezulloi operacionet e saj sipas marrëveshjes në vend që të tërhiqej nga ajo.
Deklarata më tej përcaktoi se lëvizja e anijeve përgjatë korridorit të sigurisë është “e papranueshme”, sepse Ukraina e përdor atë për të “kryer operacione ushtarake kundër Rusisë”.
“Në kushtet aktuale, nuk mund të bëhet fjalë për garantimin e sigurisë së ndonjë objekti në drejtimin e specifikuar derisa pala ukrainase të pranojë detyrime shtesë për të mos e përdorur këtë rrugë për qëllime ushtarake”, shtohet në deklaratë.
Të shtunën, Rusia njoftoi se kishte pezulluar pjesëmarrjen e saj në marrëveshjen për eksportin e grurit ukrainas pas sulmeve në flotën e saj të Detit të Zi.
Turqia, OKB, Rusia dhe Ukraina nënshkruan një marrëveshje më 22 korrik në Stamboll për të rifilluar eksportet e grurit nga tre porte ukrainase të Detit të Zi, të cilat u ndaluan pas fillimit të luftës Rusi-Ukrainë në shkurt./AA