“Shkojmë vetëm për fitore, pres atmosferë djallëzore”, ylli i Sllovenisë kërkon pikët e plota në Prishtinë

Mbrojtësi i Kombëtares së Sllovenisë Zan Karnicnik beson se kombëtarja e tij mund ta mposhtë Kosovën në “Fadil Vokrri”.

Ai para udhëtimit për në Kosovë, ka deklaruar se pret një atmosferë djallëzore në “Fadil Vokrri”, megjithatë beson se Sllovenia do të largohet me pikët e plota.

“Djemtë dhe unë e dinë se çfarë na pret në ndeshjet e radhës ndaj Kosovës dhe Zvicrës. Ndeshja e parë në Prishtinë do të jetë shumë e rëndësishme, duhet të shkojmë për fitore dhe mendoj se jemi të përgatitur mirë”.

“Fillimi do të jetë shumë sfidues në Prishtinë. Pres që Kosova ta nis me eufori shkaku i fitores ndaj Suedisë në shtator. Detyra jonë është që të provojmë t’i qetësojmë sa më shumë dhe të luajmë me stilin tonë për pjesën e mbetur të ndeshjes”.

Ai ndër të tjera shtoi se i pëlqen që stadiumi do të jetë i plotë, pavarësisht që do të jetë ndër ndeshjet më të vështira.