Reperi i njohur shqiptar, Arkimed Lushaj, i njohur gjerësisht nga publiku si Stresi, ka surprizuar ndjekësit e tij me një njoftim të rëndësishëm në rrjetet sociale.
Përmes një postimi zyrtar ku shfaqet logoja e Partisë Demokratike, ai ka bërë të ditur vendimin e tij më të fundit për t’u përfshirë aktivisht në jetën politike të vendit, duke zyrtarizuar kandidaturën për Këshillin Kombëtar të PD-së.
Në mesazhin e tij drejtuar ndjekësve, Stresi ka theksuar se ky vendim vjen si një detyrim ndaj vendit dhe rinisë shqiptare. Ai u shpreh se ky hap nuk është thjesht një lëvizje politike, por një përgjegjësi e madhe për të përfaqësuar zërin e një brezi që shpesh është ndjerë i papërfaqësuar. Duke kujtuar fillesat e tij, artisti ka vënë në dukje se vjen nga jeta reale dhe sfidat e rrugës, elemente këto që e bëjnë të njohë nga afër problemet e të rinjve.
Në thirrjen e tij publike, Stresi ka kërkuar që rinia të mos heshtë dhe të mos dorëzohet, por të ngrihet për të marrë vendin që meriton aty ku merren vendimet e mëdha. Ai ka ftuar çdo të ri që beson te ndryshimi dhe te një Shqipëri më e mirë që t’i bashkohet në këtë rrugëtim të ri, duke mbyllur mesazhin me fjalët se e ardhmja nuk pret dhe se ajo ndërtohet nga vetë ata.
Në fund të postimit, Stresi ka zbuluar edhe takimin e tij të parë zyrtar në këtë angazhim, duke ftuar mbështetësit ditën e nesërme në orën 11:00 te Pallati i Kongreseve.
