Arian Tahiri nga Partia Demokratike e Kosovës, në një konferencë për media, ka thënë se kryeministri Albin Kurti është “njeri që prodhon vetëm drama”.
Sipas tij, rezultat i këtyre zhvillimeve është situata aktuale politike.
“Rezultat i dramave të tij jemi këtu sonte, jemi pa president. Edhe jemi të cenuar me pas tendencë me u thyer rendi kushtetues”, ka thënë Tahiri.
Ai ka deklaruar se PDK-së i ishte propozuar nga Kurti që të paraqiste një kandidat, ndërsa Lëvizja Vetëvendosje të paraqiste një tjetër, për të shkuar në garë.
“Por i dimë numrat e deputetëve në Kuvend, 66 i kanë ata e ne 22. Epilogu dihet paraprakisht. Ishte tërësisht joserioze. I kemi thënë përgjigjemi pozitivisht kur e formalizojmë marrëveshjen”, tha Tahiri.
Ai shtoi se, pas mosformalizimit të marrëveshjes, PDK ka uruar suksese në procesin e zgjedhjes së presidentit me partitë tjera.
“…Pasi s’u formalizua marrëveshja, që ne të propozojmë kandidatin e kundërkandidatin, i kemi uruar suksese në zgjedhjen e presidentit me partitë tjera”.