Deputeti i Partisë Demokratike të Kosovës (PDK), Abelard Tahiri, deklaroi se policët e Kosovës po qëndrojnë në veri pa kurrfarë kushtesh, e në mungesë të shtesave që iu takojnë për rrezikshmëri.
Mbledhja e Kryesisë së Kuvend dështoi të mbahej për shkak të mungesës së kuorumit, e Tahiri tha se qasja “eksperimentale” e Qeverisë po e dëmton seriozisht Kosovën.
“Sovraniteti është redukutuar në një oborr të një komune dhe zyre te kryetari. Policët e Kosovës sot janë në atë pjesë pa kurrfarë kushtesh. Policët sot e 5 muaj nuk i kanë marrë shtesat, para që iu takojnë për rrezikshmëri…Krejt qasja eksperimentale është kah e dëmton seriozisht Kosovën”, deklaroi Tahiri.
Ndërsa, deputeti i Aleancës për Ardhmerinë e Kosovës, Besnik Tahiri, tha se kidnapimi i policëve që u liruan të hënën, ishte akt kriminal dhe i papranueshëm. Sipas Tahirit, është brengosëse situata në të cilën gjendet Qeveria dhe Kuvendi.
“Nuk u mbaj mbledhja e Kryesisë, nuk pati kuorum të mjaftueshëm. Është diskutuar për një seancë për këtë javë…Kidnapimi i policëve ka qenë një akt kriminal, i papranueshëm. Për ne si Grup Parlamentar është tepër brengosëse situata e cila gjendet në Qeveri dhe Kuvend. Ka një ngecje të punës në aspektin legjistlativ, e ngecje edhe në aspektin e qeverisjes”, shtoi deputeti opozitar.