Policia e Kosovës ka njoftuar se ka arrestuar dy persona të dyshuar për vdekjen e një personi gjatë ditës së djeshme [e martë] në Çagllavicë.
Në raportin ditor të PK-së thuhet se përpos arrestimit të dy personave të dyshuar, edhe një person tjetër është në kërkim policor, pasi që ky i fundit nuk ka qenë në shtëpi.
“Një mashkull kosovar, ka raportuar se ka vërejtur një person që dyshohet pa shenja jete. Njësitet relevante policore dhe ekipi mjekësor kanë dalur në vendin e ngjarjes ku është konstatuar vdekja e viktimës mashkull kosovar. Me vendim të prokurorit trupi i pajetë i viktimës është dërguar në IML për obduksion. Lidhur me rastin në koordinim me prokurorin dhe me urdhër të gjyqtarit është bërë bastisja në dy lokacione të ndryshme, ku në shtëpinë e të dyshuarit mashkull kosovar gjatë kontrollit janë gjetur dhe sekuestruar disa dokumente, ndërsa në lokacionin e dytë në shtëpinë e dy të dyshuarve meshkuj kosovarë nuk është gjetur asgjë e dyshimtë që ndërlidhet me rastin. Dy të dyshuarit janë arrestuar dhe pas intervistimi me vendim të prokurorit janë dërguar në mbajtje, ndërsa i dyshuari i tretë pasi që nuk është hasur në shtëpi gjendet në kërkim policor”, thuhet në raportin e PK-së.
E sipas mediumit Paparaci, dy personat e arrestuar janë babë e bir nga Lipjani, të cilët dyshohen për fajde dhe shtytje në vetëvrasjen e 37-vjeçarit.