Në seancën e së enjtes në gjykimin ndaj vëllezërve Jeton dhe Nexhat Vllasaliu, një familjar i tani të ndjerit- biznesmenit Bedri Rexhepi gjatë kohës kur Nexhati ishte duke dhënë mbrojtjen, iu drejtua me fjalët “ky o qen”.
Në këtë rast, Jeton dhe Nexhat Vllasaliu akuzohen për vrasjen e biznesmenit Bedri Rexhepi në vitin 2021, me qëllim të fitimit të dobisë pasurore.
“Ky o qen. Mos këqyr o majmun, kthehu përpara”, tha familjari i viktimës.
E gjithë kjo erdhi pasi paraprakisht, mbrojtësi i të akuzuarit Nexhat, avokati Shemsedin Piraj kërkoi nga Gjykata që përfaqësuesi i palës së dëmtuar- avokati Besnik Berisha të mos i drejtohet të akuzuarit me fjalët “rrenë” e “rrenc”.
“Konsideroj se përdorja e fjalëve ‘rrenë’ nuk lejohet dhe në parashtrimin e pyetjeve duhet me pas kujdes, kjo rrenë ajo rrenë, nuk duhet m’u leju aso pyetje”, tha avokati Piraj.
Në anën tjetër, i akuzuari Nexhat Vllasaliu i cili vazhdoi dhënien e mbrojtjes që e nisi dy seanca më parë, me të filluar seanca tha se nuk dëshiron të përgjigjet më në asnjë pyetje të avokatit Berisha, pasi që tash e tri seanca është duke e marrë në pyetje, raporton “Betimi për Drejtësi”.
Për këtë, Gjykata e njoftoi të akuzuarin se mund të mos përgjigjet në pyetje të cilat e inkriminon veten, anëtarët e familjes apo e vë veten para një turpi.
Më pas, në secilën pyetje të avokatit Berisha, i akuzuari Nexhat Vllasaliu zgjodhi të thotë se nuk ka përgjigje.
Ndërsa, duke u përgjigjur në pyetjet e avokatit Piraj, i akuzuari sqaroi se asnjëherë në jetën e tij nuk ka dëgjuar për emrin dhe mbiemrin Bedri Rexhepi. Tha se shtëpia në fshatin Vllasali edhe pse nuk banon askush në të, është e banueshme.
Ai deklaroi se ka kërkuar vazhdimisht nga vëllai i tij Jetoni që të tregojë se ku është kufoma e të ndjerit dhe se këtë e ka bërë në prezencë të gruas së Jetonit.
I pyetur nga gjykatësi Gent Beka se përse në disa raste ka folur me të akuzuarin Jeton me zë të ulët e në disa me të lartë kur kanë dalë në vendngjarje me hetues dhe prokuror për të kërkuar trupin e viktimës, i akuzuari Vllasaliu nuk u përgjigj.
Por për këtë situatë, iu përgjigj avokatit Piraj, duke thënë se i ishte kërkuar nga prokurori ta ulë zërin, me arsyetimin se kishte folur me zë të lartë dhe i kishte penguar të tjerët.
Ndërsa, kur u pyet se kur e ka kërkuar skicën e përpiluar në Prokurori për vendin se ku gjendet trupi i viktimës, a e ka bërë me zë të lartë kur kanë shkuar në vendngjarje, i akuzuari tha se nuk e di.
Pasha Zotin s’e di”, tha i akuzuari Nexhat Vllasaliu.
Prokurori Armend Hamiti njoftoi se do të propozojë një provë materiale. Më pas, seanca u ndërpre pasi që u ndal rryma në gjykatë, kurse gjykatësja Medie Bytyqi njoftoi se do vazhdohet në seancat e radhës.
Sipas aktakuzës së Prokurorisë Themelore në Prishtinë, Jeton dhe Nexhat Vllasaliu ngarkohen me veprën penale “Vrasje e rëndë”, nga neni 173, paragrafi 1.6 dhe 1.4 lidhur me nenin 31 të Kodit Penal të Republikës së Kosovës (KPRK).
Në aktakuzë thuhet se prej periudhës 9 janar 2021 deri më 8 prill 2021, të pandehurit Vllasaliu në bashkëkryerjeje pas marrëveshjes paraprake, kishin filluar planifikimin për të privuar nga jeta të dëmtuarin Bedri Rexhepi, me qëllim të fitimit të dobisë pasurore.
Të njëjtit, po ashtu ngarkohen me veprën penale “Dëmtim i varreve apo kufomave”, nga neni 413, paragrafi 2 lidhur me nenin 31 të KPRK-së. /Betimi per Drejtesi/