Qytetarët mund të paguajnë tarifa të reja për shpenzimin e energjisë elektrike.
Ato do të mund të hyjnë në fuqi në fund të muajit mars apo në fillim të prillit.
Kështu kanë bërë të ditur nga Zyra e Rregullatorit të Energjisë në një përgjigje për Klan Kosovën.
Në përgjigjen e ZRrE-së thuhet se aktualisht janë në fazën e analizimit dhe shqyrtimit të komenteve të dërguara nga palët e interesuara.
Tutje thuhet se pas shqyrtimit dhe analizimit merret vendimi për të hyrat maksimale.
“Zyra e Rregullatorit për Energji ka publikuar vlerësimin fillestar lidhur me të Hyrat e Lejuara Maksimale të ndërmarrjeve të rregulluara. Aktualisht, ZRRE është në proces të analizimit dhe shqyrtimit të komenteve të dërguara nga palët e interesuara dhe pas shqyrtimit dhe analizimit të tyre, planifikohet që kah fundi i këtij muaji të merret vendimi për të hyra maksimale. Ndërsa propozimi për tarifa bëhet nga ndërmarrjet e rregulluara konform të hyrave të aprovuara, vendimi për të cilat pritet të merret në fund të muajit mars ose në fillim të muajit prill”, thuhet në përgjigjen e ZRrE-së transmeton Klankosova.tv
“Sa i përket pritshmërisë se sa do të jenë te hyrat e lejuara maksimale, deri në këtë fazë ZRrE ka vetëm vlerësimet fillestare të cilat janë të publikuara, ndërsa vlerësimet përfundimtare për të Hyrat e Lejuara Maksimale janë në proces të shqyrtimit dhe pas këtij vlerësimi Raportet përfundimtare do të publikohen”, thuhet tutje në përgjigje.
Klankosova.tv e ka pyetur ZRrE-në se a nënkuptojnë këto tarifa të reja edhe shtrenjtim të energjisë elektrike, mirëpo nuk janë përgjigjur lidhur me këtë çështje. /KK/