Boronicat prej kohësh konsiderohen ndër frutat më të shëndetshme, dhe kjo për një arsye të fortë. Këto manaferra të vogla janë të pasura me antioksidantë, fibra dhe përbërës të tjerë të dobishëm bimorë, të cilët ndihmojnë trupin në disa mënyra.
Studimet tregojnë se konsumimi i rregullt i boronicave mund të kontribuojë në mbrojtjen e zemrës, mbështetjen e funksionit të trurit, përmirësimin e rikuperimit të muskujve pas ushtrimeve dhe në një shëndet më të mirë të përgjithshëm.
Ndihmojnë në rikuperimin e muskujve
Ushtrimet fizike mund të shkaktojnë dëmtime të përkohshme në muskuj. Boronicat mund të ndihmojnë në këtë proces falë përmbajtjes së polifenoleve, të cilat kanë veti antioksiduese dhe mund të zvogëlojnë inflamacionin.
Një përmbledhje e hulumtimeve sugjeron se boronicat mund të luajnë rol edhe në përmirësimin e forcës dhe funksionit të muskujve.
Burim i pasur i antioksidantëve
Antioksidantët janë substanca që ndihmojnë në parandalimin e dëmtimit të qelizave. Një porcion me boronica përmban më shumë antioksidantë sesa e njëjta sasi e disa frutave të tjera, si kumbullat ose luleshtrydhet.
Antioksidantët kryesorë në boronica, përfshirë antocianinat dhe polifenolet, janë treguar se ndihmojnë në uljen e inflamacionit dhe stresit oksidativ.
Përmirësojnë funksionin e trurit
Një studim ka treguar se boronicat mund të ndikojnë pozitivisht në kujtesë dhe funksionin psikomotor te të rriturit e moshuar me dëmtime të lehta njohëse.
Ato janë gjithashtu ndër frutat kryesore të përfshira në dietën MIND, një plan ushqimor që kombinon elemente të dietës mesdhetare dhe asaj DASH, me qëllim parandalimin e rënies njohëse dhe demencës të lidhur me plakjen.
Kontribuojnë në shëndetin e zemrës
Duke ndihmuar në uljen e inflamacionit dhe stresit oksidativ, boronicat mund të ndikojnë në parandalimin e forcimit të arterieve, një gjendje që rrit rrezikun për sulm në zemër dhe goditje në tru.
Një studim ka krahasuar konsumimin e 150 gramëve boronica në ditë me një placebo te personat me sindromën metabolike. Pjesëmarrësit që konsumuan boronica treguan përmirësime në funksionin e arterieve, ulje të ngurtësisë së enëve të gjakut dhe ndryshime pozitive në profilin lipidik.
Mund të mbrojnë shëndetin e syve
Boronicat mund të ndihmojnë në mbrojtjen e shikimit falë përmbajtjes së lartë të antocianinave. Këto përbërës kanë efekt mbrojtës dhe mund të zvogëlojnë rrezikun e dëmtimit të qelizave të retinës nga ekspozimi ndaj dritës.
Përfitime edhe për lëkurën
Shëndeti i lëkurës ndikohet nga faktorë të ndryshëm, përfshirë ndotjen dhe rrezatimin ultravjollcë (UV). Përmbajtja e lartë e antioksidantëve në boronica mund ta ndihmojë lëkurën të përballet më mirë me faktorët e dëmshëm mjedisorë.
Mbështesin sistemin tretës
Përfshirja e boronicave në dietë mund të ndikojë pozitivisht në shëndetin e sistemit tretës. Ato përmbajnë fibra, të cilat ndihmojnë në ndjenjën e ngopjes dhe rregullojnë lëvizjet e zorrëve.
Po ashtu, boronicat mund të kenë ndikim pozitiv në bakteret e zorrëve. Konsumimi i tyre, veçanërisht në formë të lëngshme, mund të rrisë numrin e bifidobaktereve, një lloj bakteri që ndihmon në tretjen e fibrave.