Bashkimi Evropian e ka konfirmuar vizitën e emisarit të posaçëm, Miroslav Lajçak, në Kosovë pas takimeve që ka pasur dje në Serbi, në kuadër të procesit të dialogut mes dy shteteve.
Kështu ka bërë të ditur zëdhënësi i BE-së, Peter Stano, i cili në një përgjigje për Sinjalin tha se Lajçak sot takohet me “homologët e Kosovës.
“Mund të konfirmoj se do të jetë në Prishtinë për takime me homologët e Kosovës. Kjo është pjesë e kontaktit dhe ndërveprimit të tij të vazhdueshëm me partnerët për t’i ndihmuar ata të ecin përpara në procesin e Dialogut të lehtësuar nga BE”, thuhet në përgjigjen e Stanos.
Ndryshe, edhe zëvendëskryeministri i Kosovës, Besnik Bislimi ka paralajmëruar javën e kaluar se zyrtarë evropianë do të qëndrojnë të martën në Kosovë.