Sot është shpallur tenderi 46 milionësh për zgjerimin e rrugës nacionale Prishtinë-Pejë, segmenti Dollc-Zahaq.
Për hapjen e procedurave për dorëzimin e ofertës, ka njoftuar edhe Ministri i Pushtetit Lokal, Elbert Krasniqi. Sipas Krasniqit, kjo rrugë sjell zhvillim ekonomik për rajonin e Dukagjinit dhe mundëson çasje dhe qarkullim më efektiv për qytetarët, shkruan Reporteri.net.
“Pas fillimit të punëve me dinamikë të shpejtë në segmentin Kijev-Dollc, janë hapur procedurat për dorëzimin e ofertës për ndërtimin e Rrugës Nacionale N9 Kijevë-Zahaq, përkatësisht segmenti Dollc-Zahaq. Segmenti i kësaj rruge ka gjatësi totale 16.27km, dhe buxhet të planifikuar të projektit prej rreth 46 milionë €, të ndarë në 4 lote. Kjo rrugë sjell zhvillim ekonomik për rajonin e Dukagjinit dhe mundëson çasje dhe qarkullim më efektiv për qytetarët”, ka shkruar Krasniqi.
Në njoftimin për kontratë të publikuar në faqen e Komisionit Rregullativ të Prokurimit Publik thuhet se kohëzgjatja e kësaj kontrate është për 36 muaj.
Afati i fundit për pranim të tenderëve është 29 korriku, kur edhe do të bëhet hapja e tenderëve. i Tenderi duhet të dorëzohet vetëm në mënyrë elektronike.