Një shpërthim i fuqishëm ka ndodhur sot në Pejë, ku një person ka humbur jetën pas një shpërthimi të një cisterne që ndodhi në një pompë të derivateve.
Siç raporton Telegrafi, viktima, 45-vjeç dyshohet se ishte një mjeshtër, i cili edhe kishte shkuar për të rregulluar problemin që ishte në pompën e derivateve.
Po ashtu, Altin Marmallaku, menaxher i pompës së derivateve ku ndodhi shpërthimi, ka thënë për portalin lokal Peja në Fokus, se viktima nuk është punonjës i pompës, por i një kompanie të kontraktuar për shërbime në kompaninë e tij.
Zëdhënësi i Prokurorisë Themelore të Pejës, Shkodran Nikçi, më herët konfirmoi se rasti ka ndodhur mëngjesin e sotëm.
“Një person ka humbur jetën si pasojë e shpërthimit. Në vendin e ngjarjes janë zjarrfikësit, kryeprokurori, policia dhe të gjitha organet kompetente”, tha ai.
Ndryshe, rruga Pejë-Deçan është bllokuar për qarkullim deri në përfundimin e procedurave nga Policia, e cila po qëndron te rrethi i njohur si i “Ukajve” dhe pas ekzaminimit do të lirohet për qarkullim.