Ferizaj ka shënuar fitore me rezultat 2-1 në udhëtim tek Gjilani në kuadër të javës së nëntë në elitën e futbollit kosovar.
Ky takim e hapi xhiron e nëntë në Superligën e Kosovës teksa nga dy takime të tjera do të luhen të shtunën dhe të dielën.
Mysafirët që nga minuta e parë treguan se nuk kishin ardhur në Gjilan për shëtitje, duke rrezikuar portën e Kenan Haxhihamzës në disa raste.
Për golin e epërsisë u përkujdes Edon Sadriu i cili në minutën e 15-të shënoi për rezultatin 1-0 pas një aksioni të bukur të ferizajasve.
Pak minuta para se gjyqtari të sinjalizonte për përfundimin e pjesës së parë, Ferizaj gjeti edhe golin e dytë, këtë herë me anë të Abdul i cili realizoi për 2-0.
Avantazhi prej dy golave nuk e zmbrapsi aspak Ferizajn të cilët në minutën e 50-të tundën edhe një herë tjetër rrjetën me Edon Sadriun, por goli u anulua nga VAR-i për ndërhyrje të palejuar gjatë ndërtimit të aksionit.
Vendasit arritën që të shënojnë gol me anë të Senad Jarovic i cili shënoi me kokë në minutën e 71-të për rezultatin 2-1.
Kjo ishte e tëra çfarë mund të bënin gjilanasit pasi mysafirët ia dolën që të rezistojnë deri në fund duke ruajtur epërsinë që e krijuan në pjesën e parë.
Të besuarit e Ardian Nuhiut e mbyllën ndeshjen me nëntë lojtarë në fushë pas përjashtimit me karton të kuq të Jamal Aragos dhe Besir Ramadanit.
Pas javës së nëntë Gjilani zbret në pozitën e tetë me nëntë pikë, teksa Ferizaj tashmë ka marrë vendin e shtatë me 10 sosh.