Shefi i Përgjithshëm i NATO-s, Mark Rutte, gjatë një konference për media së bashku me presidenten Vjosa Osmani, ka thënë se roli i NATO-s është të sigurojë që FSK-ja të zhvillohet si një forcë efektive për çështje humanitare.
Deklarata e tij është komentuar nga gjenerali në pension i FSK-së, Kadri Kastrati, i cili e cilësoi atë si politike, duke thënë se është bërë për të ruajtur raportet me Serbinë.
“Deklarata e tij është politike, ndoshta jo për ti hidhëruar fqinjët tanë verior. Ai e di shumë mirë, edhe NATO e di në përgjithësi, sepse NATO është prezente edhe në ministrinë e Mbrojtjes edhe në FSK. Se që nga viti 2018 kur janë aprovuara tri ligje ne Parlament, ligji për ministrinë e Mbrojtjes, ligji për shërbim në FSK dhe ligji për FSK-në. Që nga atëherë FSK-ja ka marrë mision ushtarak, që dalin detyrat kryesore nga ky mision, mbrojtje e integritet dhe sovranitetit, pjesëmarrja në operacione paqeruajtëse nëpër botë, ruajtja e pronës dhe jetës së qytetarit të Kosovës dhe zbatimi i të gjitha rekomandimeve edhe urdhrave që dalin nga institucionet qendrore dhe lokale. Dhe ky mision është dhe këto detyra janë përgjegjësi të gjitha forcave të armatosura anëtarë të NATO-s. Dhe faktikisht e di shumë ai këtë. Por deklarata e tij ruhet për shkak të mbajtjes së raporteve me Serbinë.
FSK-ja ka mision të qartë ushtarak…”, ka thënë Kastrati në FIVE të Dukagjinit.