Sot shënohet 26-vjetori i nisjes së bombardimeve të NATO-s kundër forcave serbe, një operacion ushtarak që ndryshoi rrjedhën e luftës në Kosovë dhe pati ndikim të thellë në zhvillimet gjeopolitike në rajon.
Më 24 mars 1999, NATO filloi një fushatë ajrore kundër regjimit të Slobodan Millosheviçit, me qëllim ndalimin e represionit dhe spastrimit etnik ndaj shqiptarëve të Kosovës. Operacioni, i njohur si “Allied Force”, zgjati 78 ditë dhe përfundoi më 10 qershor 1999, kur forcat serbe u detyruan të tërhiqeshin nga Kosova.
Ky ndërhyrje e udhëhequr nga SHBA dhe aleatët perëndimorë u cilësua si vendimtare për çlirimin e Kosovës dhe hapjen e rrugës për pavarësinë e saj më vonë, në vitin 2008. Megjithatë, operacioni mbeti temë debatesh ndërkombëtare, sidomos për shkak të pasojave që la në Serbi dhe për diskutimet mbi ligjshmërinë e ndërhyrjes pa një mandat të drejtpërdrejtë nga OKB-ja.
Sot, në Kosovë dhe në mbarë botën, kjo ditë kujtohet me nderime për ata që humbën jetën gjatë konfliktit dhe si një moment kyç në historinë moderne të Ballkanit./Telenews/