Kryeministri në detyrë, Albin Kurti sot gjatë përurimit të urës në Rogovë të Hasit është pyetur lidhur me atë nëse Albulena Haxhiu do të jetë përsëri emri i Lëvizjes Vetëvendosje për kryeparlamentare.
Kurti ka refuzuar të përgjigjet, gjersa ka folur për ndërtimin e urës, duke injoruar pyetjen.
“Ndërtojmë ura, e banorët e Rogovës ndërtojnë tokën”, tha ai.
Kurti po ashtu ka refuzuar të përgjigjet edhe për kallëzimin penal të paralajmëruar nga LDK-ja, raporton kp.
Ndryshe, e propozuara e LVV-së për kryetare të Kuvendit, Albulena Haxhiu nuk ka marrë votat për kryetare të Kuvendit.
Në tentimin e pestë për t’u zgjedhur kryeparlamentare, Haxhiu mori vetëm 57 vota për nga LVV-ja dhe komunitetet, 46 kundër nga PDK, LDK dhe AAK dhe ndërkaq, tre deputetët e Nisma-s abstenuan.
Vazhdimi i seancës konstituive pritet të mbahet të premten në ora 10:00.