Tensionet në rajonin e Indo-Paqësorit janë përshkallëzuar sërish, pasi Kina ka dërguar 74 aeroplanë ushtarakë drejt Tajvanit nga e enjtja në mbrëmje deri të premten në mëngjes.
Sipas Ministrisë së Mbrojtjes së Tajvanit, 61 prej tyre kaluan “vijën qendrore” në Ngushticën e Tajvanit – një veprim që konsiderohet provokues dhe i pazakontë në përmasa të tilla. Aeroplanët u dërguan në dy grupe të ndara dhe u shoqëruan nga gjashtë anije luftarake kineze.
Lëvizja ajrore e Kinës vjen menjëherë pasi anija patrulluese britanike HMS Spey kaloi përmes Ngushticës së Tajvanit, në një veprim të konfirmuar dhe mirëpritur nga Ministria e Jashtme e Tajvanit si demonstrim i lirisë së lundrimit në ujërat ndërkombëtare. Britania e Madhe theksoi se kalimi u krye sipas Konventës së Kombeve të Bashkuara mbi Ligjin e Detit.
Autoritetet kineze reaguan ashpër ndaj lundrimit të anijes britanike, duke e cilësuar një provokim që “minon paqen dhe stabilitetin” në rajon, dhe konfirmuan se trupat e tyre ndoqën nga afër operacionin.
Nuk dihet nëse vendimi i Kinës për të dërguar numër kaq të madh avionësh është një kundërpërgjigje ndaj kalimit të anijes britanike, por zhvillimet tregojnë një përshkallëzim të mundshëm të situatës në Ngushticën e Tajvanit.