Subvencionimi i librave shkollorë vazhdon të jetë një masë e rëndësishme për të mbështetur familjet dhe për të lehtësuar shpenzimet e arsimit.
Ky vit ka shënuar një interes të madh nga prindërit, me mbi 144 mijë aplikime brenda vetëm gjashtë ditëve nga hapja e procesit, sipas ministres në detyrë të Arsimit, Arbërie Nagavci. Deri tani, janë verifikuar mbi 73 mijë aplikime dhe nuk është pranuar asnjë ankesë zyrtare.
Megjithatë nga Libraria “Likoshani” në një deklarim për Telenews.al, vlerësojnë se subvencioni prej 80 eurosh për klasat 1–5 është i mjaftueshëm për librat bazë, por për nxënësit e klasave 6–9, kjo shumë mbulon vetëm fletoret e punës. Nga libraria theksojnë se për librat kryesorë, nxënësit dhe prindërit duhet të shtojnë shpenzime shtesë.
Një qytetare e kontaktuar nga Rilindja Shqiptare rrëfen për përvojën e saj: “Shuma prej 80 eurove nuk na ka mjaftuar për librat e fëmijës, kështu që kemi pasur nevojë të shtojmë edhe vetë para.”
Nga kjo panoramë duket qartë se subvencioni ka arritur të ndihmojë më shumë familjet e nxënësve të klasave të ulëta, ndërsa për nxënësit e klasave të larta, barrën financiare shpesh duhet ta mbulojnë vetë. Libraria “Likoshani” e sheh këtë si një mangësi të rëndësishme, duke theksuar nevojën për rishikim të politikave për të mbuluar më mirë librat kryesorë për klasat më të avancuara. /Telenews.al/