Leicester, Britani – Viswashkumar Ramesh, 40 vjeç nga Leicester, është i vetmi i mbijetuar i përplasjes tragjike të Air India Flight 171, e cila u rrëzua më 12 qershor pranë Ahmedabad në Gujarat, Indi. Nga aksidenti humbën jetën 241 pasagjerë dhe 19 persona në tokë.
Në një intervistë për Sky News, Ramesh rrëfeu traumat që i ka shkaktuar përvoja: “Unë vetëm mendoj për vëllain tim. Ai ishte gjithçka për mua,” tha ai me lot në sy. Ai arriti të shpëtojë pasi ndodhej pranë derës së emergjencës, ndërsa vëllai i tij, Ajaykumar, që ndodhej në një rresht tjetër, humbi jetën.
Pas aksidentit, Ramesh ka mbetur me djegie dhe dhimbje në shpatull, gjunjë e kurriz, dhe bashkëshortja e tij e ndihmon për kujdesin personal. Ai pranon se ka vështirësi të komunikojë edhe me djalin e tij katërvjeçar, Divang: “Unë nuk dal më nga shtëpia, nuk bëj asgjë, vetëm mendoj për atë ditë,” tha ai me zë të ulët.
Përfaqësuesit e Ramesh po kërkojnë nga Air India që të marrë përgjegjësi të plotë dhe të ofrojë ndihmë financiare dhe psikologjike. Kompania ka dhënë një pagesë të përkohshme prej 21,500 paundësh, por avokatët thonë se kjo “nuk mbulon as nevojat minimale”. Ata kërkojnë që drejtori ekzekutiv, Campbell Wilson, të takohet personalisht me Ramesh dhe familjet e viktimave.
Air India ka deklaruar se mbetet e përkushtuar për të mbështetur familjet e prekura dhe ka ofruar takim me Ramesh dhe përfaqësuesit e tij.