Kryeministri në detyrë i Kosovës, Albin Kurti, ka reaguar pas njohjes së Republikës së Kosovës nga Bahamas, duke e cilësuar këtë zhvillim si një arritje të rëndësishme në forcimin e subjektivitetit ndërkombëtar të vendit.
Sipas Kurtit, viti 2024 ishte viti i liberalizimit të vizave dhe i pasaportës së Kosovës, ndërsa viti 2025 po shënon një kapitull të ri me njohje të reja ndërkombëtare, pas një periudhe të gjatë stagnimi.
Ai ka uruar qytetarët për këtë arritje, duke shprehur mirënjohje të veçantë për presidenten Vjosa Osmani, zyrtarët shtetërorë dhe partnerët ndërkombëtarë për angazhimin e tyre.
“Kosovës po i shtohen miqësitë e reja dhe, bashkë me to, edhe mundësitë e bashkëpunimit. Mezi presim që njohjen e ndërsjellë ta kthejmë në një partneritet të sinqertë me shtetin dhe popullin e Bahamas”, ka deklaruar Kurti.
Bahamas është shteti i katërt që e njeh Kosovën gjatë këtij viti dhe i 121-ti në total që e njeh Republikën e Kosovës si shtet të pavarur dhe sovran.