Karakteristikat e zakonshme të këtyre përmbajtjeve janë absurditeti, mungesa e një skenari të qartë dhe qasja e thjeshtë, që i bën shumë tërheqëse për shikuesit e rinj.
Një pjesë e madhe e përmbajtjes që shfaqet për përdoruesit e rinj të YouTube nuk është produkt i kreativitetit njerëzor, por rezultat i një industri në rritje të “AI slop” – përmbajtjes së prodhuar nga Inteligjenca Artificiale me cilësi të ulët, krijuar kryesisht për të mbledhur shikime dhe përfitime financiare.
Sipas një studimi të kompanisë Kapwing, mbi 20% e videove të rekomanduara për një përdorues të ri përbëhen nga kjo lloj përmbajtjeje dhe disa kanale kryesisht AI kanë arritur të akumulojnë mbi 63 miliardë shikime dhe 221 milionë abonentë, duke gjeneruar rreth 117 milionë dollarë në vit.
Fenomeni nuk është lokal, por global. Këto kanale janë të shpërndara në vende si India, SHBA, Brazil, Egjipt, Pakistan dhe shikueshmëria e tyre përqendrohet në forma të thjeshta, shpesh absurde: aventurat e një majmuni antropomorfik dhe një superheroi të modeluar pas Hulk-ut që luftojnë demonë, apo historia të përditshme të kafshëve të animuara që udhëtojnë në pyje me ëmbëlsira dhe hanë sushi kristali, shpesh të shoqëruara me tinguj fëmijësh duke qeshur.
Karakteristikat e zakonshme të këtyre përmbajtjeve janë absurditeti, mungesa e një skenari të qartë dhe qasja e thjeshtë, që i bën shumë tërheqëse për shikuesit e rinj.
Analistët e teknologjisë paralajmërojnë se industria e AI slop nuk është vetëm një fenomen argëtues; është një sistem i strukturuar ekonomik, ku krijuesit përdorin algoritme dhe platforma të mëdha sociale për të maksimizuar shikueshmërinë dhe fitimet.
Në disa raste, këta krijues jetojnë kryesisht nga përmbajtja e automatizuar, duke fituar më shumë se paga mesatare në vendet e tyre, ndërsa komunitetet globale në Telegram, WhatsApp dhe Discord shkëmbejnë këshilla, ide dhe kurse për të krijuar përmbajtje virale.
Megjithatë, sfidat për platforma si YouTube janë të mëdha. Pavarësisht përpjekjeve për të kufizuar përmbajtjen joautentike, algoritmet vazhdojnë të promovojnë videot që kapin vëmendjen, pavarësisht cilësisë apo saktësisë së informacionit. Shumë prej këtyre kanaleve përmbajnë “brainrot” – përmbajtje të dekonstruara, pa kontekst, të krijuara thjesht për të monetizuar vëmendjen e përdoruesve.
Ky fenomen tregon se teknologjia e AI-së nuk është thjesht një mjet i ri kreativ, por edhe një industri globale e ekonomisë së vëmendjes, ku algoritmet shpesh mbizotërojnë mbi kreativitetin njerëzor, dhe përmbajtja e dobët mund të fitojë miliarda shikime.
Sfidat për mediat, edukatorët dhe autoritetet rregullatore janë të qarta: si të mbrojnë shikuesit, veçanërisht fëmijët dhe përdoruesit e rinj, nga dezinformimi dhe përmbajtja manipulatore, ndërkohë që teknologjia zhvillohet me ritme të shpejta.