“Sllovakia favorit, por synojmë suksesin historik”, Vedat Muriqi flet për gjysmëfinalen e play-offit

Sulmuesi Vedat Muriqi e sheh Sllovakinë si favorite për gjysmëfinalen e play-offit të Kupës së Botës, mirëpo premton se Kosova do të jep gjithçka për të avancuar tutje.

Muriqi ka dhënë një intervistë të gjatë për mediumin sllovak “Dennik Sport”, ku foli për përshtypjet e para të ndeshjes Sllovaki – Kosovë.

Ylli i Mallorcas publikisht pranoi se Sllovakia është favoriti kryesor, por beson se kjo do t’i konvenojë Kosovës meqenëse ata do të jenë nën presion.

“Sa i përket tifozëve sllovakë, mendoj se është logjike. Një pjesë e tyre janë të kënaqur sepse na shohin si kombëtare pa përvojë që kanë qenë në skenë për nëntë ose 10 vite”.

“Në anën tjetër, ata që na kanë parë së paku një herë dhe e dinë se çfarë të presin. Nuk do të thosha se ky grup është i frikësuar prej nesh, por definitivisht e respekton kualitetin e lojtarëve tanë”.

“Unë e shoh kështu, pavarësisht kundërshtarit, Kosova gjithmonë do të jetë jo-favorite. Favoriti është kundërshtari ynë. I pashë që sllovakët nuk janë të fortë vetëm taktikisht, por psiqikisht”.

“Pas shortit shikova disa ndeshje të Sllovakisë dhe mund të themi në pikëpamjen taktike, janë shumë të organizuar. Do të jetë ndeshje e mirë, por e përsëris Sllovakia është favorite”.

“Luajnë në shtëpi para tifozëve dhe pas shumë viteve duan të kthehen në turne. Jam i sigurt se kombëtarja juaj do të bëjë gjithçka për të shkuar në finale. Kjo na përshtatet, sepse Sllovakia do të jetë nën presion”.