Shkodra është përballur sërish me murtajën e kafshëve të vogla, pas një mungese prej afro një viti.
Për të frenuar përhapjen e sëmundjes, Ministria e Bujqësisë së Shqipërisë ka lëshuar urdhër për vendosjen e zonës në karantinë, në një rreze prej 3 deri në 10 kilometrash.
Mediat e Shqipërisë, kanë raportuar se rasti i parë është konfirmuar në fshatin Mali i Gjymtit, ku 20 krerë dele janë groposur, transmeton Klankosova.tv.
Përveç tyre, pritet asgjësimi edhe i afro 60 krerëve të tjerë.
Përveç Dajç, Drejtoria Rajonale e Ekstensionit Bujqësor në Shkodër ka nisur kontrolle edhe në zona të tjera për të parandaluar përhapjen e sëmundjes.
Autoritetet theksojnë se murtaja prek kafshët, por nuk transmetohet tek njerëzit.
Vitin e kaluar, tre raste të ngjashme u raportuan në Shkodër, duke detyruar asgjësimin e bagëtive të imta dhe vendosjen e karantinës në zonat e prekura, sipas afateve ligjore.