Të paktën 19 persona janë dërguar në spital pasi u raportua për një erë të fortë në një kompleks tregtar në Tokio.
Sipas raportimeve, një zëdhënës i policisë tha se një burrë kishte spërkatur një substancë në një bankomat në katin përdhes të ndërtesës në qendrën luksoze tregtare Ginza 6 të hënën, shkruan BBC.
Substanca besohet të ketë qenë një sprej irritues, i identifikuar nga autoritetet si sprej që ka të ngjarë të përmbajë kapsaicinë – e cila gjendet në specat djegës.
Policia është ende në kërkim të të dyshuarit, raporton transmetuesi kombëtar NHK.
Njerëzit pranë vendit të ngjarjes raportuan se ndjenë dhimbje dhe kruarje në fyt, me një grua 70-vjeçare që i tha AFP-së se filloi “të pickonte dhe të dhembte” ndërsa iu afrua bankomatit.
“Kur mbërrita, rrëmuja kishte filluar tashmë dhe mendova se mund të kishte pasur një zjarr të vogël ose diçka të tillë,” tha ajo.
“Sapo shkova në cepin e bankomateve, fyti im ndjehej i kruar, pothuajse i mpirë.”
Një numër i madh i forcave të emergjencës ishin të pranishme në vendngjarje, duke përfshirë oficerë policie, zjarrfikës dhe punonjës të ambulancës. Rruga përpara qendrës u bllokua pas incidentit.
Zyrtarë të veshur me kostume mbrojtëse u panë duke nxjerrë njerëzit nga qendra tregtare.