Një qytetar ka dorëzuar në Stacionin Policor në Viti një portofol të gjetur, brenda të cilit ndodheshin dokumente personale, karta bankare dhe një shumë parash të gatshme.
Sipas njoftimit të Drejtorisë Rajonale të Policisë në Gjilan, qytetari B. Haziri është paraqitur në Polici më 6 gusht 2026 dhe ka njoftuar për gjetjen e portofolit.
Pas pranimit të tij, zyrtarët policorë kanë ndërmarrë veprimet e nevojshme dhe, përmes verifikimit të dokumenteve, kanë arritur ta identifikojnë dhe ta kontaktojnë pronarin.
Portofoli, së bashku me të gjitha dokumentet, kartat bankare dhe paratë, i është kthyer pronarit legjitim.
Policia Rajonale e Gjilanit ka falënderuar qytetarin për veprimin, duke theksuar se raste të tilla dëshmojnë rëndësinë e bashkëpunimit dhe besimit ndërmjet qytetarëve dhe Policisë së Kosovës.