Instituti Kombëtar i Shëndetësisë Publike të Kosovës (IKSHPK) ka njoftuar se më 1 tetor do të shënohet Dita Ndërkombëtare e Personave të Moshuar, me fokus në promovimin e shëndetit, pavarësisë dhe cilësisë së jetës në moshë të shtyrë.
Përmes një postimi, IKSHPK ka bërë të ditur se motoja e sivjetme është “Epoka e jetëgjatësisë: Përshtatja e sistemeve për një jetë më të gjatë dhe më të mirë”, duke theksuar rëndësinë e respektit, kujdesit dhe mbështetjes për personat e moshuar.
“Po afrohet Dita Ndërkombëtare e Personave të Moshuar – 1 Tetor! Me moton: ‘Epoka e jetëgjatësisë: Përshtatja e sistemeve për një jetë më të gjatë dhe më të mirë’, kjo ditë na kujton rëndësinë e respektit, kujdesit dhe mbështetjes për të moshuarit, duke promovuar shëndetin, pavarësinë dhe cilësinë e jetës në moshë të shtyrë”, thuhet në njoftimin e IKSHPK-së.
IKSHPK ka njoftuar se, në bashkëpunim me Ministrinë e Shëndetësisë, do të organizojë një takim me përfaqësues të institucioneve, organizatave që merren me çështjet e personave të moshuar dhe përfaqësues të mediave.
“Instituti Kombëtar i Shëndetësisë Publike i Kosovës, në bashkëpunim me Ministrinë e Shëndetësisë, do të shënojë këtë ditë me takim me përfaqësues të institucioneve, organizatave që merren me çështjet e personave të moshuar, si dhe përfaqësues të mediave”, thuhet tutje në postim.
Ndërkohë, sipas IKSHPK-së, aktivitetet edukative do të zhvillohen gjatë gjithë muajit tetor, me qëllim të rritjes së ndërgjegjësimit për rëndësinë e moshimit të shëndetshëm.
“Aktivitetet edukative do të zhvillohen gjatë tërë muajit tetor për të rritur ndërgjegjësimin mbi moshimin e shëndetshëm”, thuhet në njoftim.