Asociacioni i Gazetarëve të Kosovës (AGK) ka dënuar fyerjet, sulmet dhe kërcënimet ndaj gazetarit Fidan Jupolli, autor i emisionit satiriko-politik “DPT Te Fidani” në Klan Kosova.
Sipas AGK-së, këto sulme kanë ndodhur pas komenteve dhe emisioneve që lidhen me protestën në Prishtinë për ish-krerët e UÇK-së dhe krizën rreth zgjedhjes së Presidentit.
AGK-ja ka shprehur mbështetje për Jupollin, duke e përkrahur në ndërmarrjen e veprimeve ligjore për denoncimin e sulmeve, të cilat, sipas reagimit, cenojnë edhe integritetin fizik të tij dhe të familjes së tij.
Në reagim, AGK-ja u ka bërë thirrje akterëve politikë dhe përkrahësve të tyre që mospajtimet për çështjet me interes publik të mos shndërrohen në kërcënime dhe dhunë.
Në fund, Asociacioni ka rikujtuar se liria e shprehjes dhe e medias është e drejtë themelore e garantuar me Kushtetutën e Republikës së Kosovës.