Agjencia e Menaxhimit Emergjent (AME) ka përfunduar me sukses trajnimin për përdorimin e mjeteve themelore për shuarjen e zjarrit, i cili u mbajt më 5 nëntor në Akademinë e Kosovës për Siguri Publike.
Në këtë trajnim morën pjesë 25 zyrtarë nga Ministria e Ekonomisë dhe Qendra Kryesore e Mjekësisë Familjare në Vushtrri, të cilët patën mundësi të fitojnë njohuri teorike dhe praktike për përdorimin e pajisjeve kundër zjarrit dhe reagimin në situata emergjente.
Sipas njoftimit të AME-së, gjatë pjesës praktike pjesëmarrësit demonstruan përdorimin e aparateve për shuarjen e zjarrit në situata të simuluara, me qëllim të rritjes së gatishmërisë për ndërhyrje të sigurt dhe efektive.
Agjencia ka theksuar se trajnimet e tilla janë të rëndësishme për ngritjen e kapaciteteve institucionale dhe forcimin e kulturës së parandalimit dhe sigurisë.
“Parandalimi, përgatitja dhe reagimi profesional janë tri shtyllat kryesore të sigurisë dhe mbrojtjes së jetës dhe pronës”, thuhet në njoftimin e AME-së.
Në fund, AME ka përgëzuar pjesëmarrësit për përfundimin e suksesshëm të trajnimit dhe i ka falënderuar për bashkëpunimin.