Deputetja e Lëvizjes Vetëvendosje Tinka Kurti, ka njoftuar se Kuvendi i Kosovës do ta ketë dhomën e gjidhënies.
Kurti tha se e ka parashtruar kërkesën si kryetare e Grupit të Grave Deputete.
“Kuvendi është institucioni i parë që do të ketë dhomën e gjidhënies. Këtë kërkesë e kam bërë si Kryetare e GGD-së pas tryezës që kishim mbajtur me këtë temë. Jam fort e lumtur që Kryetari i Kuvendit dhe Sekretari e kanë aprovuar dhe kjo tashmë është duke u realizuar. Deputetet dhe të punësuarat e Kuvendit të cilat kanë nevojë t’i ushqejnë fëmijët e tyre me qumësht gjiri do ta kenë së shpejti këtë hapësirë të veçantë e cila po bëhet sipas rekomandive të OBSH-së. Tjetër rekomandim i kësaj organizate është edhe hartimi i politikave përkrahëse, zbatimi i tyre por edhe promovimi nga politikanet e politikanët”-tha Kurti.
Ajo tha se një kërkesë të tillë do t’u dërgohet edhe institucioneve të tjera publike dhe private.
“Një kërkesë e tillë do t’u dërgohet institucioneve të tjera publike. Madje inkurajohen edhe ato private. Shpresojmë se dhoma brenda Kuvendit do të jetë modeli që përhapet shpejt” – tha ajo.