Europa është vënë në garë me kohën për të gjetur një rrugëdalje nga kriza energjetike, në prag të atij që paralajmërohet të jetë dimri më i vështirë në dekada. Ndërsa presidenti rus, Vladimir Putin, paralajmëroi se do të ndërpresë të gjitha furnizimet duke e “ngrirë” kontinentin e vjetër, Gjermania, shteti me më shumë varësi nga gazi rus, zotohet se do të gjejë një mënyrë për të ulur çmimet e për të luftuar krizën.
“Gjëja më e rëndësishme është të ndalim menjëherë manipulimin e çmimeve nga Putin. Ne nuk mund të dorëzohemi përballe çmimeve të larta, dhe prandaj duhet të ndyshojmë modelin e tregut të energjisë në mënyrë që kostot e favorshme t’u kalojnë konsumatorëve”, tha ministri i Ekonomisë, Robert Habeck.
Ministri i Ekonomisë shtoi se qeveria do të krijonte një paketë masash mbrojtëse për kompanitë gjermane, dhe programe lehtësuese për bizneset e vogla.
Presidentja e Komisionit Europian, Ursula Von Der Leyen, prezantoi të mërkurën propozimet e shumëpritura për të luftuar krizën energjetike dhe për të reduktuar çmimet në rritje që po vendosin nën stres të madh financiar familjet dhe kompanitë europiane.
“Synojmë uljet e çmimeve të gazit dhe do të propozojmë një tavan në çmimin e gazit rus. Propozojmë gjithashtu një objektiv të detyrueshëm për të reduktuar elektricitetin në orët e pikut dhe do të punojmë ngushtë me shtetet anëtare për të arritur. Është koha që konsumatorët të përfitojmë nga burimet low cost të energjisë, dhe ne do të propozojmë rikanalizimin e të ardhurave nga këto burime”, u shpreh Von Der Leyen.
Ministrat e Energjisë së BE-së takohen të premten për t’u dakordësuar mbi një plan të gjerë të bllokut që do të adresojë çmimet në rritje të energjisë.