Nga mesi i muajit korrik, Lulzim Rafuna ka filluar punën si kryetar i ri i Odës Ekonomike të Kosovës (OEK).
Por, dy muaj pas marrjes së detyrës, Rafuna po ballafaqohet me pretendime për disa sërë shkeljes që ndërlidhen me pozitën e tij në krye të Odës Ekonomike.
Sekretari i Odës Ekonomike të Kosovës, Sami Mazreku, ka denoncuar në Prokurorinë e Shtetit dhe Agjencinë Kundër Korrupsion gjendjen e dyshuar të Lulzim Rafunës në konflikt interesi.
Përmes dy shkresave drejtuar Prokurorisë Themelore në Prishtinë Agjencisë Kundër Korrupsion në javën e dytë të shtatorit, Mazreku ka kërkuar të iniciohen procedura hetimore ndaj Rafunës, nën dyshimin për konflikt interesi.
Sekretari i OEK-ut pretendon se gjendja e konfliktit të interesit në rastin e Rafunës lidhet me angazhimet e tij paraprake në Doganën e Kosovës.
Sipas pretendimeve të ngritura nga sekretari i OEK-t, Lulzim Rafuna është ende i emëruar si këshilltar i Drejtorit të Doganës së Kosovës, në cilësinë e Zyrtarit të Lartë Publik, me të cilin Oda Ekonomike ka partneritet.
Shkresa e Sekretarit të OEK-ut, drejtuar AKK-së
Një pretendim tjetër kundër Rafunës tashmë ndodhet edhe në Inspektoratin e Punës. Edhe këtë kallëzim e ka iniciuar Sekretari i OEK-ut.
Sipas pretendimeve të sekretarit, Rafuna është duke ushtruar funksionin e kryetarit pa përmbushur detyrimin e nënshkrimit të kontratës së punës.
Sipas tij, Rafuna nuk ka dhënë asnjë sqarim për mos nënshkrimin e kontratës.
Në shkresën drejtuar Inspektoratit të Punës thuhet se Rafuna është “duke shfrytëzuar asetet e OEK-ut si dhe duke keqpërdorur për nevojat e tij personale automjetin zyrtar të OEK-ut”.
“Poashtu, në kundërshtim me autorizimet ligjore dhe të drejtat e tij nga marrëdhënia e punës, “i zgjedhuri” Lulzim Rafuna pa lejen dhe autorizimin e punëdhënësit, është duke shfrytëzuar asetet e OEK-ut, duke keqpërdorur për nevojat e tij personale automjetin zyrtar të OEK-ut”, thuhet në shkresën drejtuar Inspektoratit të Punës.
Lulzim Rafuna ishte zgjedhur kryetar i Odës Ekonomike të Kosovës më 14 korrik të këtij viti.
Ai u zgjodh kryetar me 27 vota, ndërsa mandati i kryetarit është katërvjeçar.
Lulzim Rafuna më parë ishte ish-drejtor i Doganës së Kosovës, ministër në detyrë i Financave dhe këshilltar i ish-ministrit të Financave, Bedri Hamza, dhe kryeministrit shqiptar Edi Rama.