Rusia iu kthye marrëveshjes për eksportet e grurit nga Ukraina sepse e kuptoi se iniciativa do të funksiononte pa përfshirjen e Kremlinit, tha të mërkurën një zyrtar i lartë ukrainas.
Këshilltari i presidentit ukrainas, Mykhailo Podolyak, tha se vendimi i Moskës tregon se “shantazhi” dhe “përshkallëzimi dhe kërcënimet” ruse nuk kanë sukses kur përballen me një përgjigje vendimtare.
“Në një mënyrë apo tjetër, Rusia u kthye në “iniciativën e grurit” me turp, sepse doli që korridori i grurit do të kishte funksionuar edhe pa pjesëmarrjen e Kremlinit,” tha Podolyak.
“Kjo tregon vetëm një gjë: Rusia është gjithmonë inferiore ndaj atyre që janë më të fortë, atyre që dinë të godasin, atyre që argumentojnë fort pozicionin e tyre”, shtoi ai.
Ministria ruse e Mbrojtjes njoftoi të mërkurën se Rusia do të vazhdojë të marrë pjesë në marrëveshjen e eksportit të grurit.
“Federata Ruse konsideron se garancitë e marra aktualisht duken të mjaftueshme dhe vazhdon me zbatimin e marrëveshjes”, njoftoi Ministria e Mbrojtjes.
Rusia njoftoi të shtunën se po tërhiqej nga një marrëveshje për eksportin e grurit pas, siç tha ajo, një sulm të madh me dron ndaj anijeve në portin e Sevastopolit në gadishullin e aneksuar të Krimesë.