Burbuqe Hana, UD e Kryeshefes Ekzekutive të Telekomit të Kosovës, e ka pritur sot në zyrën e saj konsumatorin më të moshuar të “Valës”, Riza Aruqin 100-vjeçar.
Në njoftimin e kompanisë publike, ”Vala” thuhet se në një atmosferë të ngrohtë dhe e rrethuar me stafin e saj, Hana i uroi shëndet të moshuarit dhe të përdorë shërbimet e “Valës” edhe shumë e shumë vite, transmeton Telenews.al
Përkundrejt protokollit standard për pritje të tilla, ajo uli axhën Riza “në krye të vendit”, në karrigen e saj, duke i thënë se në Telekom, konsumatori është zot shtëpie.
Sipas saj, konsumatori ynë më i moshuar “kryet e vendit” e meriton për shkak të moshës, vitalitetit dhe urtisë gjithsesi, por edhe për shkak të besnikërisë së tij ndaj “Valës”.
Riza Aruqi me vitalitetin e tij dhe komunikimin e kthjelltë, duhet të jetë ndër 100-vjeçarët e rrallë në Kosovë, i cili me familjen dhe miqtë e tij ende komunikon shumë me telefon. Me këtë rast, në njoftimin e kompanisë thuhet se Telekomi i Kosovës në shenjë mirënjohjeje për besnikërinë si konsumator i rregullt i dhuroi një kredi në llogarinë e tij, në vlerë prej 100 euro, që në mënyrë simbolike përkon me moshën e tij.
Gjithashtu duke marrë në konsideratë moshën e tij, Vala njoftoi se Telekomi siguroi edhe lehtësime të tjera për konsumatorin e vet special.
Vlen të ceket se Riza Aruqi është konsumator besnik dhe i rregullt i Valës që nga viti 2005.