Rastet kur publikimi i pamjeve që cenon integritetin dhe privatësinë e vajzave të reja, janë bërë të shpeshta. Këto veprime zakonisht kryhen nga persona të cilët ishin të afërt me to, e të cilët këto veprime i bëjnë në shenjë hakmarrjeje apo në formë shantazhi.
Viktimë e një veprimi të tillë ka rënë edhe një vajzë në Obiliq, pasi ish i dashuri i saj ia ka publikuar nëpër rrjete sociale.
Sinjali mëson se 19-vjeçarja ka njoftuar Policinë se i dyshuari me të cilin ishte tri vjet në lidhje dashuria, ia ka shpërndarë fotot intime në Snapchat dhe Instagram dhe vazhdimisht e kërcënon me mesazhe e thirrje.
Si rezultat i denoncimit, i dyshuari është arritur që të arrestohet dhe të shoqërohet në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që 26-vjeçarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Fotografimi dhe incizimet tjera të paautorizuara’.