Presidenti ukrainas Volodymyr Zelensky thotë se lejimi i Rusisë për të garuar në Lojërat Olimpike 2024 në Paris do të tregonte se “terrori është disi i pranueshëm”.
Ai tha se e kishte ngritur këtë çështje me presidentin francez Emmanuel Macron.
Moska nuk duhet të lejohet të përdorë Lojërat Olimpike për propagandë, shtoi ai.
Komiteti Olimpik Ndërkombëtar (IOC) ka thënë se atletët rusë dhe bjellorusë mund të garojnë si neutralë në Lojërat Olimpike.
Por Ukraina ka kërcënuar se do të bojkotojë “Paris 2024”nëse atletët rusë dhe bjellorusë lejohen të garojnë.
Përpjekjet e Komitetit Olimpik Ndërkombëtar “për të rikthyer atletët rusë në Lojërat Olimpike janë përpjekje për t’i thënë të gjithë botës se terrori është disi i pranueshëm”, tha Zelensky në një video-fjalim, raporton BBC.
Rusia nuk duhet të lejohet të përdorë Lojërat “ose ndonjë ngjarje tjetër sportive si propagandë për agresionin e saj ose shovinizmin e saj shtetëror”, shtoi ai.
Komiteti Olimpik Ndërkombëtar tha këtë javë se atletët rusë dhe bjellorusë mund të konkurrojnë si “atletët neutralë”, duke deklaruar se “asnjë atlet nuk duhet të pengohet të garojë vetëm për shkak të pasaportës së tyre”.
Por Zelensky thotë se nuk mund të ketë neutralitet në sport, ndërkohë që atletët e vendit të tij po vdesin në fushën e betejës.
Ai gjithashtu bëri krahasimin me Lojërat Olimpike të vitit 1936 në Berlin, kur nazistët ishin në pushtet.
“Kishte një gabim të madh olimpik,” tha ai. “Lëvizja Olimpike dhe shtetet terroriste definitivisht nuk duhet t’i kalojnë shtigjet”.
Qeveria e Mbretërisë së Bashkuar ka dënuar gjithashtu planin për të lejuar atletët të garojnë në mënyrë neutrale si një “botë larg realitetit të luftës”.