YouTube Premium po teston një abonim të ri, më të lirë për dy persona në tregje të caktuara.
Ky opsion është aktualisht i disponueshëm për abonentët në Indi, Francë, si dhe në Tajvan dhe Hong Kong. Nuk është e sigurt nëse do të zgjerohet në tregje të tjera.
“Po eksperimentojmë me mënyra të reja për t’u ofruar më shumë fleksibilitet dhe vlerë abonentëve tanë të YouTube Premium, duke përfshirë ofrimin e një plani Premium për dy persona, i cili u lejon dy personave të ndajnë një abonim me një çmim të zbritur”, tha një zëdhënës i YouTube për CNET në një deklaratë.
Në Indi, ky nivel i ri ofrohet me një çmim prej 219 rupish indiane, ose 2.60 dollarë. Ekziston gjithashtu një ofertë e veçantë dhe më e lirë e YouTube Music për dy persona me çmim 149 rupi indiane, ose 1.77 dollarë.
Nëse kjo kategori me dy persona arrin në SHBA, ka të ngjarë të jetë shumë më e shtrenjtë se ajo që ofrohet në Indi.
YouTube është një pjesë kyçe e biznesit të Google. Sipas Statista, faqja e transmetimit gjeneroi 36.1 miliardë dollarë të ardhura nga reklamat në vitin 2024. Kjo përbën 13.66% të të ardhurave totale.
Në të njëjtën kohë, mirëmbajtja e një faqeje falas globale transmetimi me më shumë se dy miliardë përdorues aktivë mujorë, është e kushtueshme.
Përveç reklamave, Premium ishte një mënyrë për të rritur të ardhurat e faqes. Një abonim premium u ofron përdoruesve një përvojë pa reklama, qasje në YouTube Music dhe lejon shkarkimin e videove.
Kohët e fundit, Google ka qenë duke shqyrtuar mënyra të tjera për të nxitur abonimet Premium, të cilat aktualisht kushtojnë 14 dollarë në muaj për individët dhe 23 dollarë për familjet.
Në mars, u shtua një abonim në YouTube Premium Lite, i cili nuk përfshin YouTube Music, kufizon shkarkimet e videove dhe bllokon luajtjen në sfond kur ekrani është i fikur.
Megjithatë, Premium Lite ka një çmim më tërheqës prej 8 dollarësh në muaj për individët.