Komandanti i KFOR-it, gjeneralmajor, Enrico Barduani, ka takuar sot komandantin e Forcave të Armatosura të Sllovenisë, Boshtjan Moçnik, në shtabin e KFOR-it, në Camp Film City në Prishtinë.
“Ata diskutuan pikëpamjet për tema të ndryshme, duke përfshirë sigurinë e qëndrueshme në gjithë Kosovën, situatën e stabilitetit rajonal dhe përpjekjet e KFOR-it në mbështetje të dialogut të lehtësuar nga BE-ja ndërmjet Prishtinës dhe Beogradit”, tha KFOR në një njoftim.
Barduani gjithashtu ka falënderuar Moçnik për kontributin e Sllovenisë në misionin e NATO’s në Kosovë dhe stabilitetin e rajonit.
KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
KFOR-i punon në koordinim të ngushtë me Policinë e Kosovës dhe Misionin e Bashkimit Europian për Sundimin e Ligjit në Kosovë (EULEX) në rolet e tyre përkatëse si reagues të sigurisë.
https://www.facebook.com/NATOKFOR/posts/962853039280163?ref=embed_post