SHKRUAN EDMOND VILA
Me derbin lokal të Prizrenit, është mbyllur xhiro e 11-të e Superligës së Kosovës në basketboll te meshkujt.
Ekipi i Proton Cable Prizrenit me fanelat bardhezi e ka mposhtur Bashkimin portokalli, falë dallimit kryesor i cili u bë në çerekun e fundit (23-13), derisa epilogu final ishte 90-82.
Bashkimi e filloi ndeshjen më mirë duke e fituar çerekun e parë (18-26), por kjo ishte e tëra çfarë pamë nga portokallinjët, pasi Proton Cable Prizreni i dominoi të tri periudhat vijuese të lojës, ku fillimisht e ngushtoi avantazhin para pushimit (24-20) me çka pjesa e parë u mbyll me diferencë të ngushtë 42-46 në favorin e Bashkimit.
Trajnerit të Bashkimit Edin Kërveshi, i doli loja komplet nga kontrolli në çerekun e fundit në të cilin assesi nuk gjente zgjidhje për t’a ndalur sulmin e Prizrenit të udhëhequr nga dyshja Sills-Mala dhe kështu fitorja me meritë i takoi Proton Cable Prizrenit.
Me këtë lojë të treguar dhe pa kurrfarë koncepti, si dhe me transferimet e bëra që janë ”shterpe”, Bashkimi do ta ketë shumë të vështirë edhe futjen në ”play off”, derisa titulli mbetet vetëm një ëndërr e ”Arpagjik”-ve që vazhdojnë të brohorasin për klubin e zemrës, por pa rezultat konkret.
Pas 11 xhirove, thellohet bilanci i zi i Bashkimit me 7 humbje dhe vetëm 4 fitore, derisa rivali lokal Prizreni arriti fitoren e dytë rresht dhe të katërtën në total me 7 humbje të tjera.
Në xhiron e 12-të, Bashkimi e pret Sigal Prishtinën e P.C Prizreni i shkon Trepçës.