Bashkimi Evropian ka reaguar lidhur me arrestimin e shtetasit kosovar Arbnor Spahiu nga autoritetet serbe, duke theksuar nevojën për respektim të plotë të procedurave ligjore dhe të të drejtave themelore.
“BE-ja po ndjek nga afër arrestimin e Arbnor Spahiut nga autoritetet serbe. Ne presim që autoritetet serbe të respektojnë dhe të sigurojnë zbatimin e rregullt të procedurës ligjore,” thuhet në deklaratën e tyre për Dukagjinin.
Ky reagim vjen pas shqetësimeve të ngritura nga autoritetet kosovare dhe organizatat e të drejtave të njeriut për mënyrën e ndalimit të Spahiut dhe mungesën e informacionit për trajtimin e tij në paraburgim.
Bashkimi Evropian ka rikujtuar Serbinë për detyrimin që ka ndaj respektimit të të drejtave themelore të njeriut dhe sigurimin e një procesi të drejtë ligjor, në përputhje me standardet dhe vlerat evropiane që ajo është zotuar të ndjekë në kuadër të integrimit evropian.