Ministri i Kulturës, Rinisë dhe Sportit, Hajrulla Çeku i ka reaguar kreut të AAK-së, Ramush Haradinajt, i cili ka thënë se Stadiumi i Gjakovës po ndërtohet pa mbështetjen e Qeverisë.
Çeku i ka replikuar Haradinajt, duke thënë se kjo nuk është e vërtetë, pasi sipas tij stadiumi po ndërtohet në bashkëfinancim të Qeverisë me Komunën e Gjakovës.
Sipas ministrit, Qeveria ka zotuar 9 milionë euro për këtë stadium.
“Në të gjitha deklarimet e mia publike, në të folur dhe në të shkruar, kam qenë maksimalisht korrekt në raport me stadiumin e Gjakovës dhe angazhimin e komunës dhe kryetarit Gjini. Për dallim nga komunat e tjera, Gjakova të paktën brenda mundësive ka ndarë buxhet për ndërtimin e stadiumit. Mirëpo, një investim kaq i madh nuk mund të bëhej pa mbështetjen e qeverisë qendrore dhe për këtë arsye kemi zotuar nëntë milionë euro, pra pjesën dërmuese të buxhetit të nevojshëm për përfundimin e punimeve”, ka shkruar ai.
Çeku ka thënë se kjo nga Haradinaj është tentim-mashtrimi i qëllimshëm.
“Bashkëpunimi i qeverisë me komunat, shumë investime të kryera viteve të fundit në qytete e fshatra gjithandej vendit, janë lajm i mirë dhe detyrim i përbashkët i dy niveleve të qeverisjes. Gënjeshtrat në anën tjetër, sidomos kur thuhen nga njerëz me përgjegjësi institucionale, janë metodë primitive e të bërit politikë. Ne nuk presim vlerësim pozitiv për qeverinë nga kryetari Haradinaj, por e sigurojmë atë dhe gjithë të tjerët që do të reagojmë sa herë që ai ose të tjerët qëllimshëm i gënjejnë qytetarët”, ka shkruar ministri në Facebook.