Çmimet e arit kanë pësuar një rritje të ndjeshme pas përshkallëzimit të tensioneve mes Izraelit dhe Iranit, teksa investitorët janë drejtuar drejt aseteve të sigurta për të mbrojtur kapitalin e tyre.
Në tregun fizik, një ons ar u tregtua mëngjesin e sotëm me 3,423.46 dollarë, që përfaqëson një rritje prej 1.2% krahasuar me mbylljen e djeshme. Që nga fillimi i javës, ari ka shënuar një rritje mbi 3.5%.
Edhe kontratat e ardhshme të arit në tregun amerikan u tregtuan me 1.2% më lart, duke arritur në 3,444.10 dollarë për ons.
Rritja e çmimit vjen në sfondin e sulmeve ajrore izraelite ndaj objekteve bërthamore dhe fabrikave të raketave në Iran, të cilat Tel Avivi i ka cilësuar si një përpjekje për të ndalur kapacitetet bërthamore të Teheranit. Në kundërpërgjigje, Irani ka lëshuar rreth 100 dronë drejt territorit izraelit.
“Sulmet po nxisin një valë blerjesh në tregun e arit… por është ende herët për të thënë nëse kjo do të përkthehet në një trend afatgjatë”, tha analisti i Julius Baer, Carsten Menke. Ai paralajmëroi se ndërprerjet e mundshme në furnizimin me naftë mund të ndikojnë më tej në tregjet e metaleve të çmuara.
Ndërkohë, çmimi i argjendit mbeti i qëndrueshëm në 36.36 dollarë për ons, paladiumi u rrit me 0.5% në 1,061.06 dollarë, ndërsa platini pësoi një rënie prej 1.5%, duke u tregtuar në 1,274.30 dollarë.