Gazetarët kosovarë janë mbledhur bashkë për t’i dalur kundër pushtetit të Albin Kurtit pas vendimit për t’ia hequr lincencën Klan Kosovës.
Në mbështetje të televizionit, gazetarë të mediave vendore e përfaqësues të ambasadave kanë mbajtur sot një tryezë të përbashkët për të planifikuar fushatë në mbrojtje të fjalës së lirë, e kundër përpjekjeve të Qeverisë për ta shuar atë.
Fushata do të nisë të hënën, me cak të qartë e vendime konkrete. Kështu ka bërë të ditur ish-drejtori i Klan Kosova, Adriatik Kelmendi.
“I bëjmë thirrje të gjitha mediave që angazhohen për median e lirë dhe demokracinë në Kosovë të na bashkohen. Se, siç na e kujton gjithmonë “The Washington Post” – demokracia vdes në errësirë!”, ka shkruar ai.
Gazeta online Reporteri.net do t’i bashkohet fushatës. Gjithmonë në mbrojtje të mediave të lira, gazetarëve dhe lirisë së shprehjes.
Njoftimi i plotë:
Sot e kemi një betejë të fituar, por e dimë se lufta e medias për fjalën e lirë është e përhershme!
Kjo na ka bërë bashkë, që si gazetarë të lirë dhe media të lira, ta shtojmë vigjilencën që liria të mos na rrëshqasë nga duart.
Ky ishte edhe qëllimi i një tryeze të përbashkët sot të shumicës së mediave kryesore në vend dhe përfaqësuesve të ambasadave, në të cilën u morën vendime që të bashkuar, me hapa konkretë protestues, ta nisim fushatën për mbrojtjen e medias nga pushteti.
Fushata, e cila do ta ketë logon, cakun e qartë dhe veprime konkrete, do të fillojë nga e hëna.
I bëjmë thirrje të gjitha mediave që angazhohen për median e lirë dhe demokracinë në Kosovë të na bashkohen.
Se, siç na e kujton gjithmonë “The Washington Post” – demokracia vdes në errësirë!
Faleminderit për përkrahjen!