Gjykata Supreme ka vendosur që `Rregullorja për Menaxhimin e Mbeturinave` në Prishtinë të mbetet në fuqi, duke rrëzuar kërkesën e Komunës për pezullimin e saj. Sipas rregullores, faturat për shërbimin e mbeturinave duhet të paguhen në Kompaninë Rajonale të Menaxhimit “Pastrimi”, jo në komunë.
Supremja e ka refuzuar si të pabazuar kërkesëpadinë e Komunës së Prishtinës për masën e përkohshme të sigurisë ndaj zbatimit të ‘Rregullores për Menaxhimin e Mbeturinave’, të ndryshuar më 5 dhjetor 2024 dhe publikuar më 31 dhjetor 2024.
Rregullorja përcakton që faturat për shërbimin e mbeturinave duhet të paguhen drejtpërdrejt në Kompaninë Rajonale të Menaxhimit “Pastrimi” Sh.A., dhe jo në Komunën e Prishtinës, siç kishte kërkuar kjo e fundit më 5 shkurt 2025.
Në vendimin e gjykatës theksohet se “të ndalohet prodhimi i efekteve juridike të Rregullores” nuk ka bazë ligjore dhe pezullimi i zbatimit të aktit nënligjor nuk mund të bëhet pa vendim përfundimtar mbi ligjshmërinë e tij.
Me këtë, gjykata rrëzon pretendimin e komunës për ndërprerjen e efekteve juridike të rregullores derisa të vendoset meritorisht për padinë.
Aktgjykimi është i prerë dhe hyn në fuqi menjëherë pas komunikimit me palët.