Kandidati i Partisë Demokratike të Kosovës (PDK) për Kryeministër, Bedri Hamza, ka thënë se prioritet të qeverisjes së tij, në rast se merr besimin për të udhëhequr me ekzekutivin kosovar, në politikën e jashtme do ta ketë – ndër të tjera – normalizimin e raporteve ndërfqinjësore.
Këto komente, Hamza i bëri përmes një postimi në Facebook, pas takimit që pati me Emisarin Special të Gjermanisë për Ballkanin Perëndimor, Manuel Sarrazin.
Kryetari i Mitrovicës njoftoi se me top-diplomatin gjerman ka diskutuar për zhvillimet politike në vend e rajon.
“Si subjekt politik, kemi qenë dhe vazhdojmë të jemi të përkushtuar, që në koordinim të plotë me partnerët tanë ta forcojmë paqen dhe sigurinë në tërë rajonin tonë”, shkroi Hamza.