Ambasadori i SHBA-së në Kosovë, Jeffrey Hovenier rithekson se po përballen me disa sfida me Qeverinë e udhëhequr nga Albin Kurti.
Hovenier tha se veprimet e fundit të Kurtit kanë ndikuar në cilësinë e partneritetit SHBA-Kosovë.
“Shumë prej jush keni parë raportet për dallimet e tashme mes SHBA dhe anëtarëve të tjerë të bashkësisë ndërkombëtare me Qeverinë e Kosovës për disa veprime të cilat janë të udhëhequra nga qeveria e kryeministrit Kurti. Siç kam thënë edhe javën e shkuar, po përballemi me disa sfida me qeverinë e tanishme të Kosovës të cilat kanë ndikuar në cilësinë e partneritetit tonë”.
Hovenier tutje shpreson që Qeveria e Kosovës t’i kthehet angazhimit të ngushtë me SHBA, BE, NATO-n dhe partnerët e tjerë ndërkombëtarë.
“Siç tha edhe DASH, Qeveria amerikane shpreson që Qeveria e Kosovës t’i kthehet angazhimit të ngushtë me SHBA, BE, NATO-n dhe partnerët e tjerë ndërkombëtarë të Kosovës. Edhe pse disa fusha te bashkëpunimit me Qeverinë e Kosoves mbesin më pak pozitive se që do të kishim shpresuar, përkushtimi i SHBA ndaj popullit të Kosovës mbetet po aq i fortë, i hekurt si gjithmonë”, tha ai gjatë konferencës pas marrëveshjes së grantit në vlerë prej 34.5 milionë dollarësh, mbështetje e USAID për Kosovën.